കുവൈറ്റ് ക്നാനായ കൾച്ചറൽ അസോസിയേഷൻ (കെ കെ സി എ ) അക്ഷരദീപം മലയാളം പഠനകേന്ദ്രത്തിന്റെ നേതൃത്വത്തിൽ കേരളപ്പിറവി ദിനാഘോഷവും, പ്രവേശനോത്സവവും അബ്ബാസിയ ആർട്ട് സർക്കിൾ ഹാളിൽ വച്ച് നവംബർ 5 ന് വിപുലമായി ആഘോഷിച്ചു . ഭാവി തലമുറയ്ക്ക് മലയാളഭാഷയോടുള്ള അഭിരുചി വർദ്ധിപ്പിക്കുവാൻ പ്രചോദനമേകുമാറ് ഒരു സ്കൂൾ പ്രവേശനോത്സവത്തിന്റെ പ്രതീതിയോടെയാണ് പരിപാടി അരങ്ങേറിയത്. അക്ഷരദീപം ഹെഡ്മാസ്റ്റർ ജയ്സൺ മേലേടം അദ്ധ്യക്ഷത വഹിച്ച യോഗത്തിൽ കെ. കെ. സി.എ പ്രസിണ്ടന്റ് ജയേഷ് ഓണശ്ശേരിൽ പരിപാടി ഉദ്ഘാടനം ചെയ്തു. തുടർന്ന് KKCA ജെനറൽ സെക്രട്ടറി ശ്രീ.ബിജോ മാൽപാങ്കൽ , ട്രഷറർ ശ്രീ.ജോസ്കുട്ടി പുത്തൻതറ, മലയാളം മിഷൻ കെ. കെ. സി. എ അക്ഷരദീപം മേഖല കോർഡിനേറ്റർ ശ്രീ.ജിനു കുര്യൻ എന്നിവർ ആശംസകൾ അറിയിച്ചു.വിദ്യാർത്ഥി പ്രതിനിധി അക്സ മരിയ ജോമോൻ ഇതുവരെയുള്ള അക്ഷരദീപം മലയാള ഭാഷാ പഠനം കുട്ടികൾക്ക് എങ്ങനെ പ്രയോജനം ചെയ്തു എന്നതിനെ വിവരിച്ച് സംസാരിച്ചു. മറ്റ് കുട്ടികളുടെയും അധ്യാപകരുടെയും കാവ്യാലാപനം, ഗെയിമുകൾ എന്നിവ ആഘോഷങ്ങൾക്ക് മാറ്റുകൂട്ടി. പ്രസ്തുത മീറ്റിംഗിൽ അധ്യാപനവൃത്തിയിൽ നിന്നും വിരമിക്കുന്ന ശ്രീ. ജോബി ചാമംകണ്ടയിലിനെ മെമെന്റോ നൽകി ആദരിച്ചു.പുതിയ അധ്യയന വർഷത്തേക്കുള്ള പാഠ്യപുസ്തകങ്ങൾ അധ്യാപകർക്ക് വിതരണം ചെയ്യുകയും, ഈ വർഷം പുതുതായി അക്ഷരദീപം പാഠ്യപദ്ധതിയിലേക്ക് നിയമിക്കപ്പെട്ട അസിസ്റ്റൻറ് ഹെഡ്മാസ്റ്റർ ശ്രീ ടോമി പടിഞ്ഞാറെനന്നികുന്നേലിനെയും, കെ. കെ. സി.എ അക്ഷരദീപം കോർഡിനേറ്ററായി നിയമിക്കപ്പെട്ട ശ്രീ.ബൈജു ജോസഫ് കോച്ചാംകുന്നേലിനെയും കുട്ടികൾക്കും അധ്യാപകർക്കും പരിചയപ്പെടുത്തുകയും ചെയ്തു. വരുൺ കുര്യൻ, എലിസബത്ത് ഷാജി എന്നിവർ പരിപാടികൾ ഏകോപിച്ചു.